მაშინ, როდესაც ტექნოლოგიების ეპოქა ახალ-ახალ გამოწვევებს გვთავაზობს, ციფრული პროდუქტების შექმნის პროცესი უფრო კომპლექსური ხდება. ამ სირთულეს კი ბუნებრივია, ახალ-ახალი პროფესიების გაჩენა ახლავს თან, რომელთაგან ერთ-ერთი მნიშვნელოვანი IT ბიზნეს ანალიტიკოსია.
ამიტომ გასაკვირი არ იქნება თუ გეტყვი, რომ 2019 წლიდან დღემდე ამ პროფესიაზე მოთხოვნა 11%-ით არის გაზრდილი, საქართველოში კი IT ბიზნეს ანალიტიკოსის საშუალო ანაზღაურება 3500 ლარია.
ამ ბლოგში კი მინდა უფრო დეტალურად გესაუბრო IT ბიზნეს ანალიტიკოსის პროფესიაზე, მის მოვალეობებსა და კარიერული განვითარების გზაზე.
IT ბიზნეს ანალიტიკოსი ციფრული პროდუქტის (აპლიკაცია, საიტი) განვითარების გუნდის წევრია, რომელიც ერთგვარი შუამავლის როლს ასრულებს ბიზნესსა და IT გუნდს შორის, უფრო მარტივად რომ ვთქვათ, იგი ბიზნეს მოთხოვნებს თარგმნის IT სპეციალისტებისთვის გასაგებ ენაზე და პირიქით, ამიტომ მას საქართველოში “ბიზნეს თარჯიმანსაც” უწოდებენ.
ბუნებრივია, გარდა თარჯიმნობისა, IT ბიზნეს ანალიტიკოსს სხვა ისეთი მნიშვნელოვანი მოვალეობებიც აკისრია, როგორიცაა:
● ბიზნესის მოთხოვნების განსაზღვრა და აღწერა
● პროდუქტის არსებული მდგომარეობის ანალიზი
● პროდუქტის განვითარების მომავლის განსაზღვრა – ამ ნაწილში IT ბიზნეს ანალიტიკოსი გეგმავს თემატურ შეხვედრებს დაინტერესებული მხარეებისთვის (პროდუქტის დამკვეთი, დეველოპერები და სხვ.), რათა მათთან ერთად გაანალიზოს პროდუქტის სამომავლო განვითარება და ეფექტური კონტროლისთვის ეტაპობრივად მიიღოს უკუკავშირი.
● თითოეული ბიზნეს მოთხოვნის ტექნიკური გუნდისთვის თარგმნა და პროცესის კონტროლი მათ სრულ შესრულებამდე.
ასე და ამგვარად, IT ბიზნეს ანალიტიკოსის როლი საკმაოდ საპასუხისმგებლოა, თუმცა დამეთანხმები, რომ კარიერულ გზაზე არსებულ სირთულეებთან გამკლავების პროცესი ყოველთვის დიდი წარმატებისკენ გიკვალავს გზას.
მართალია, IT ბიზნეს ანალიტიკოსზე მოთხოვნა დიდია, მაგრამ საქართველოში კვალიფიციური კადრების რაოდენობა მცირეა. ამიტომ, თუ ფიქრობ, რომ ამ სფეროში განვითარება და წარმატების მიღწევა გსურს, მაშინ ისეთი უნარებიც უნდა გქონდეს, როგორებიცაა:
● ანალიტიკური აზროვნება
● გადაწყვეტილების მიღების უნარი
● პრობლემის გადაჭრის უნარი
რაც შეეხება კარიერულ განვითარებას, IT ბიზნეს ანალიტიკოსის კარიერული გზა სწორხაზოვანი ნამდვილად არ არის და რადგან მას საკმაოდ მჭიდრო კავშირი აქვს გუნდთან, ეს ერთგვარი მობილობის საშუალებას აძლევს ისეთ პოზიციებზე, როგორიცაა Product Owner, Project Manager და ა.შ
ამიტომ თუ ფიქრობ, რომ ისეთი პროფესია უნდა აირჩიო, რომელიც სხვადასხვა მხარეს მოგზაურობის შესაძლებლობას მოგცემს, ვფიქრობ IT Business Analysis შენთვისაა. გარდა ამისა, ეს სფერო შენგან მხოლოდ ციფრული პროდუქტების შექმნისა და მისი მართვის პროცესის მიმართ ინტერესს მოითხოვს.
ავტორი: თათა ვახტანგაშვილი
