ტექნოლოგიური განვითარების პარალელურად არაერთი კომპანია ცდილობს, არ ჩამორჩეს ბაზარზე არსებულ მოთხოვნებს და თავის მომხმარებლებს ციფრული პროდუქტი შესთავაზოს. აპლიკაციისა თუ ვებ-ტექნოლოგიის განვითარების პროცესში მრავალი ადამიანი მონაწილეობს, რომელთაც განსხვავებული როლი და პასუხისმგებლობები აკისრიათ.
ბიზნეს ანალიტიკოსი, Product Owner, პროექტების მენეჯერი – ეს სამი ადამიანი გადამწყვეტ როლს თამაშობს პროდუქტის განვითარების პროცესში. ამ ბლოგში კი გაგაცნობ მათ მთავარ მოვალეობებსა და პასუხისმგებლობებს, რომელთა ეფექტურად შესრულებაც წარმატებული ციფრული პროდუქტის შექმნის ერთ-ერთი მთავარი გარანტიაა.
ამ პროფესიის ადამიანის მოვალეობა ბაზრის შესწავლა, ორგანიზაციის ბიზნეს საჭიროებების განსაზღვრა და არსებული პრობლემებისთვის გამოსავლის ძიებაა. ისინი თანამშრომლობენ დაინტერესებულ პირებთან, რათა გააანალიზონ პროდუქტზე არსებული მოთხოვნები და ისინი განვითარების გეგმად ჩამოაყალიბონ. ბიზნეს ანალიტიკოსები ასევე ჩართულნი არიან პროდუქტის ბაზარზე გამოშვების შემდეგ მისი ეფექტურობის შეფასებაშიც.
ამასთანავე, ბიზნეს ანალიტიკოსი აქტიურად თანამშრომლობს Product Owner-თან და პროექტების მენეჯერთან. იგი ქმნის დოკუმენტაციას, სადაც აღწერილია ის საბაზრო და სამომხმარებლო მოთხოვნები, რომლებიც პროდუქტმა უნდა დააკმაყოფილოს. განვითარების ბოლო ეტაპზეც ბიზნეს ანალიტიკოსი იკვლევს, რამდენად სრულდება აღნიშნული საჭიროებები.
Agile მეთოდოლოგიით მართული პროცესების ერთ-ერთი მნიშვნელოვანი მონაწილე Product Owner არის. იგი პასუხისმგებელია პროდუქტის ფუნქციონალებისა და მოთხოვნების განსაზღვრასა და განვითარებაზე. ისინი მჭიდროდ თანამშრომლობენ დეველოპერებთან, რათა უზრუნველყონ პროდუქტის დროულად შექმნა და ბიზნეს საჭიროებების სრულად გათვალისწინება. ამისთვის ისინი გეგმავენ პროდუქტის განვითარების თითოეულ ეტაპს.
პროექტების მენეჯერის როლი მოიცავს პროდუქტის შექმნისა და განვითარების სტრატეგიისა და ხედვის დასახვას. ამასთანავე, მის მოვალეობებში შედის კომუნიკაციის წარმართვაც. ისინი ასევე მჭიდროდ თანამშრომლობენ დეველოპერებთან, რათა უზრუნველყონ პროდუქტის მიერ ბაზრისა და ბიზნესის ყველა საჭიროების დაკმაყოფილება. ისინი მუშაობენ კომპანიის სხვა დეპარტამენტებთანაც – გაყიდვების, მარკეტინგის და სამომხმარებლო სერვისის გუნდებთან, რათა პროდუქტმა წარმატებულად იფუნქციონიროს ბაზარზე.
ეს როლი ხშირად იკვეთება Product Owner-თან, რომლისგანაც იღებს ძირითად ინფორმაციას პროდუქტის განვითარების მიმდინარე ეტაპების შესახებ. მასთან ერთად გეგმავს, როდის და რა მიმართულებით უნდა წარიმართოს ეს პროცესი, როგორ მიმდინარეობს მუშაობა გუნდში, რა საკითხები საჭიროებს სწრაფ გადაწყვეტას და ა. შ.
სამივე მიმართულება მუშაობს კომპანიის პროდუქტის განვითარებაზე, რომელმაც უნდა დააკმაყოფილოს ბაზარზე არსებული საჭიროებები და წარმატებით შეასრულოს მისი ფუნქციები. ამის მისაღწევად კი ისინი განსხვავებული კუთხით მუშაობენ, თუმცა, მათი მოვალეობები რამდენიმე განხრით მაინც საერთოა.
თითოეული როლის წარმომადგენელი თანამშრომლობს დაინტერესებულ პირებთან (კომპანია, მომხმარებლები, სხვა ორგანიზაციები), რათა პროექტის მიზნები ეხმიანებოდეს ბიზნეს საჭიროებებს. სამივე ადამიანი მუდმივად აგროვებს ინფორმაციას არსებული მოთხოვნების შესახებ, რათა ღირებული შედეგები მიიღონ. ამ შემთხვევაში განსხვავდება მხოლოდ მათი ფოკუსი: Product Owner ამ მხრივ ფუნქციონალების განვითარებაზე ზრუნავს, ბიზნეს ანალიტიკოსი მოთხოვნების დეტალურ მიმოხილვას აკეთებს, ხოლო პროექტ მენეჯერის მთავარი საზრუნავი პროექტის წინასწარ განსაზღვრულ ფარგლებსა და ვადებში დასრულებაა.
გარდა ამისა, სამივე პროფესია პრობლემის გადაჭრაზე მუშაობს და შეიმუშავებენ ამა თუ იმ საკითხის მოგვარების გზებს. ეს შეიძლება შეეხებოდეს პროდუქტის ირგვლივ არსებულ ხედვას, პროექტების რისკების მართვასა თუ სხვა პროცესებს. აღნიშნული მოვალეობების ეფექტურად შესასრულებლად კი სჭირდებათ მსგავსი რბილი უნარებიც. მათ უნდა ჰქონდეთ კომუნიკაციის კარგი უნარი, რათა ეფექტურად წარმართონ ურთიერთობა დაინტერესებულ მხარეებთან და თანამშრომლებთან (დეველოპერებთან, სხვა დეპარტამენტების წარმომადგენლებთან, რომლებიც პროდუქტის განვითარების პროცესში მონაწილეობენ). მათ უნდა შეეძლოთ პრიორიტეტების განსაზღვრაც, რათა ხარვეზების გარეშე მართონ მიმდინარე პროცესები. ხოლო გაუთვალისწინებელი შემთხვევების დროს, შეეძლოს სწრაფი ადაპტაცია და არსებული გამოწვევების ეფექტურად გადაწყვეტა.
ამგვარად, ციფრული პროდუქტი განვითარების საკმაოდ მრავალფეროვან გზას გადის და ამაში არაერთი ადამიანი მონაწილეობს. მათი მოვალეობები და პასუხისმგებლობები ხშირ შემთხვევაში ერთმანეთის მსგავსია, თუმცა მოქმედების სფერო – უფრო კონკრეტული. დღეს სამივე პროფესიის წარმომადგენელი მნიშვნელოვან როლს თამაშობს წარმატებული ციფრული პროდუქტის შექმნაში, რის გამოც მათზე მოთხოვნა მზარდია.
ამიტომ, თუ ტექნოლოგიები და ციფრული სფერო გიზიდავს, შეარჩიე შენს ინტერესებზე მორგებული პროფესია და შეისწავლე მომავლის მაღალანაზღაურებადი უნარები Commschool-ში. გაეცანი ჩვენი კურსების სილაბუსს და აღმოაჩინე შენთვის საინტერესო ციფრული პროფესია!
